Katikkiro Mayiga aggaddewo ekitundu ky’Emmwaanyi Terimba ‘A’ n’okukunga Bannabulemeezi

0
Advertisement

Kamalabyonna Charles Peter Mayiga alambudde abalimi b’Emmwaanyi abasukkulumye  mu ssaza Bulemeezi era nasaba n’abantu abalala okubalabirako bazirime bwebaba baagala okuwona obwavu n’okwekulaakulanya.

Obubaka buno Katikkiro Mayiga abuwadde alambula abalimi ab’enjawulo wansi w’enteekateeka y’Emmwaanyi Terimba neyeebaza Palamenti olw’okusimbira endagaano y’ Emmwaanyi ekkuuli.

Advertisement

“Omuganda agamba nti Obulangira bw’omukopi  kwekolera era singa Ssebitosi tabadde mukozi ne mukyala we wano sandizeewo. Twetubadde ewa Mwami Ssemyaano ow’ E mmamba bagambye nti ebiseera by’okwekubagiza byaggwako. Ndabye abantu bangi abava e Bulemeezi abeekubagiza nga bajjukira olutalo naye buli aneekubagiza talisomesa baana wadde okwekulaakulanya,” Owek. Mayiga bw’agambye.

Okusinziira ku Katikkiro Mayiga obulimi  bwebugenda okutuusa ku bannayuganda ku mutendera oguddako era akikakasa nti obulimi busobola okubatwala mu makolero awamu ne Saayansi ne Tekinologiya nga bwegwali e South Korea.

Owek. Mayiga asabye abazadde okusomesa abaana awatali kwawula mu ddiini  kuba essuubi lya Buganda liri mu baana era bafube okubeera abakozi era abatetenkanya okusobola okutwala Buganda mu maaso.

Ono abalabudde okukomya okuyimba ebibasomooza era bafube okuliikiriza ennimiro zabwe nga bakozesa ente ne Nnakavundira bwebaba baagala okugatta kwebyo byebafuna era nasaba abalimi okugabana amagezi kuba amagezi muliro.

Mu kulambula kuno, Katikkiro Mayiga  asookedde wa Mw. Ssemyano Timothy ku kyalo Magere e Semuto gy’alambulidde  yiika ezisoba mu 9 ez’emmwaanyi. Oluvannyuma yeyongeddeyo e Nnyanja mu ggombolola ye Ssemuto ewa Mw. Adam Ssebitosi nga naye alima emmwaanyi mu bungi era namulaga watuuse.

Minisita w’ebyobulimi, obulunzi obwegassi era avunaanyizibwa ku Butondebwensi mu Buganda, Owek. Mariam Mayanja Nkalubo, akubirizza abantu okusoosowaza Obutondebwensi olwo bajja kusobola okulima awatali kwelarikirira kuba enkuba bajja kuba bagifuna mu budde.

Ye omubaka omukyala owa Nakaseke, Sarah Najjuma yeebazizza Katikkiro Mayiga olw’okugezaako okuyiiyiza Buganda enteekateeka ez’enjawulo ezikulaakulanya abantu ba Buganda okusobola okubaggya mu bwavu era nakunga abalimi okunywerera ku Mmwaanyi.

Omu ku balimi Adam Ssebitosi ategeezezza nti ekimu ku kyasinga okumukwatako bwe bubaka bweyawa nga agamba nti obugagga ntuuyo  era namwebaza olw’enteekateeka ez’enjawulo okutumbula embeera z’abantu mu Buganda.

Mu kulambula kuno Katikkiro Mayiga abadde awerekeddwako Omulangira Daudi Chwa, Owek. Mariam Mayanja Nkalubo, Minisita Hamis Kakomo, Owek. Noah Kiyimba n’abakungu ab’enjawulo.

Advertisement
KAMPALA BUSINESS RADIO