Katikkiro Mayiga alambise abakyala kunkuza y’abaana entuufu

0
Advertisement

Katikkiro Charles Peter Mayiga akuutidde abakyala okukwasa abaana amakubo amatuufu wadde bingi bisobye mu ggwanga kiyambe okutaasa ebiseera by’eggwanga eby’omu maaso.

Okusaba kuno Katikkiro Mayiga akukoledde mu nsisinkano n’aba Mother’s Union okuva mu bulabirizi bw’e Namirembe nga bakulembeddwamu Pulezidenti wabwe  omuggya Nnaalongo Roseline Bingi Kawiso, e Bulange Mmengo ku Lwokusatu.

Advertisement

“Twagala okulaba nti amaka gongera okukwasa abaana amakubo amatuufu wadde waliwo ebikyama byetulaba mu Uganda naye tukyasobola okuba n’eggwanga ery’omu maaso eddamu. Nze mukulaba okwange bamaama bateeka okwewala enjogera egamba nti  Uganda bwetyo, ffe abasajja nebwetunagisigarako,” Owek. Mayiga bw’alambuludde.

Okusinziira ku Katikkiro Mayiga ebimu ku bigendererwa by’ekibiina bya byakutaba abakyala abafumbo awamu n’okubakumaakuma kuba kizuuliddwa nti abantu bonna ab’omugaso bava mu maka agatebenkedde obulungi.

Mayiga abakuutidde okugunjula obulungi abaana kuba obuvunaanyizibwa n’empisa mu baana okusinga babiggya ku ba maama ababalambika.

Abakyala bano abasabye okuzzaawo enkola y’abakyala okufumbirwa nga bakyali bato kikendeeze ku bakyala abalemwa okufumbirwa kuba ensangi zino  abavubuka abasinga tebakyalaba mukwano ng’empagi enkulu mu Buganda nga okusinga batunuulidde byanfuna.

Owek. Mayiga bano abawadde amagezi baddemu okusisinkanya abaana babwe basobole okwemanya kuba bulijjo omuntu atuuse okuwasa omwagalwa amuggya mu bantu bawangaala nabo okulwanyisa ekizibu ky’ ababeezi ababaferera ku mutimbagano.

Kamalabyonna Mayiga abasabye okwezimba kuba kizuuliddwa nti ebimu ebitabangudde amaka be bakyala abasusse obunafu nebalemwa okuyiiya.

Owek. Mayiga Pulezidenti omuggya Roseline Bingi Kawiso, amutegeezezza obubatya bisomoozo kuba obukulembeze kitegeeza kutuukiriza buvunaanyizibwa awamu n’okusala amagezi agavvuunuka ebikalubo era nakakasa nti webamuteeramu obwesige obusobozi buno abulina.

Minisita w’ebyobulamu, enkulaakulana y’Abantu n’ensonga za woofiisi ya Nnabagereka,  Oweek Dr. Prosperous Nankindu Kavuma asabye okunyweza okwagala yonna gyebali okusobola okumalawo ebizibu ebibalumba mu maka neeyo gyebawangaalira.

Pulezidenti w’ ekibiina ki ‘Mother’s Union’ e Namirembe, Roseline Bingi Kawiso,  asabye Obwakabaka bwa Buganda okubayambako kuba omukyala y’Enkuluze y’Obuwangwa olw’ensonga nti ye musomesa asookerwako nga yasobola okulambika abaana.

Abakyala bawagidde enteekateeka y’emisinde gya Kabaka egy’okubaawo nga 3/ July/ 2022 nga baguze emijoozi gya mitwalo 50.

Ensisinkano eno yeetabiddwamu Minisita Noah Kiyimba, Minisita Mariam Mayanja Nkalubo, Omukubiriza wa Ttabamiruka w’abakyala mu Buganda, Omuzaana Kimbugwe awamu n’abalala.

Bya Francis Ndugwa, Bulange – Mmengo

Advertisement
KAMPALA BUSINESS RADIO