Katikkiro Mayiga atongozza eng’oma Ggwangamujje okulwanyisa Covid-19

Okusinziira ku Katikkiro Mayiga, ekisinga okutta bantu mu bulwadde buno kwe kuba nti obulwadde buno bwetooloddwa obutamanya era abantu n’ebintu ebyandibayambye babyesammula nga balowooza nti birimu akabi.

0

Katikkiro Charles Peter Mayiga atongozza eng’oma Ggwangamujje egenda okukubwa Abaami ba Kabaka mu nteekateeka y’okukunga abantu ba Beene wonna mu Buganda okusitukiramu balwanyise ekirwadde kya Ssennyiga Corona era n’asaba Abaami okukulemberamu olutalo luno.

Enteekateeka eno ebadde mu Bulange- Mmengo ku Lwokusatu era Mukuumaddamula asinzidde wano n’asaba abantu okumanya akabi akali mu bulwadde buno obwa Lumiimamawuggwe.

“Kambabuulire empologoma eyatulumba ye Lumiimamawuggwe, etusensera, etulya tetulaba era tetutegedde kuba ffenna abali wano tusobola okuba nga tulina obulwadde nga tetumanyi, ayinza okuba mu ngalo, leka kwekwata mu nnyindo, mu maaso, mu mimwa. Akabi kajja tulina okutegeeza ensi nti empologoma ezze naye bwe weerwanako ogiwona naye bwe weekwata ku maaso ekulya.”

Kamalabyonna Mayiga agamba nti mu buli mbeera, eggwanga lirina okusoosowaza ebyobulamu era n’asaba Abaami ba Kabaka okukulemberamu olutalo ku Lumiimamawuggwe nga Beene bwe yalagira.

Okusinziira ku Katikkiro Mayiga, ekisinga okutta bantu mu bulwadde buno kwe kuba nti obulwadde buno bwetooloddwa obutamanya era abantu n’ebintu ebyandibayambye babyesammula nga balowooza nti birimu akabi.

Mayiga asiimye aba Dreamline Products olw’obuyiiya mu kusaasaanya amawulire agakwata ku Sennyiga Corona kuba okuva edda obuyiiya bw’eng’oma omwali Saagalaagalamidde, Ggwangamujje n’endala, zaayambanga nnyo okutumbula embeera z’abantu n’okubakuuma.

“Mu Mirembe egyayita abalya ensi baali abo abalina ffeeza ne zzaabu, ekiseera ne kijja ng’abalina amatwale nga Bungereza. Ekiseera ne kituuka nga abalina amafuta be baliwo naye batugamba nti, oyo agenda okulya ensi mu biseera eby’omu maaso y’oyo ategedde ebyempuliziganya era atambula n’okumanya.” Owek. Mayiga bw’alambuludde.

Mu ngeri yeemu ku mukolo guno, Obwakabaka buyingidde mu ndagaano n’aba Dreamline Products nga ku lwa Buganda, Owek. Hajji Amisi Kakomo y’ataddeko omukono ate Kenneth Mulondo n’assaako ku lwa Dreamline Products.

Minisita omubeezi ow’ebyamawulire ne tekinologiya mu gavumenti eyaawakati,  Owek. Joyce Nabbosa Ssebuggwawo asinzidde wano n’asaba abasomesa beegemese kisobozese okwanguyiza gavumenti okukola enteekateeka z’okuggulawo amasomero era n’asaba abantu okwekuuma ekirwadde kino.

Omukungu wa Dreamline Products, Mw. Kenneth Mulondo ategeezezza nti basinzidde ku bukulu bw’eng’oma ne bakkiriza nti esobola okukunga abantu okusobola okulwanyisa Ssenyiga Corona.

Mu nteekateeka eno, eng’oma eno yaakukubibwa okukubiriza abantu okukola, okuteeka mu nkola ebiragiro by’abasawo ku kulwanyisa Ssenyiga corona nga mu bino kuliko; okunaaba mu ngalo, okwambala obukookolo, okwewa amabanga n’ebirala.

(Bya Francis Ndugwa, Bulange – Mmengo)

KAMPALA BUSINESS RADIO