Buganda ne Uganda Law Society basse omukago

0

Katikkiro wa Buganda, Charles Peter Mayiga, atongozza omukago wakati wa Buganda awamu n’ekibiina ekitaba bannamateeka ekya Uganda Law Society ogugendereddwamu okutuusa empereeza ku bantu abeetaavu mu Buganda ne Uganda.

Bw’abadde atongoza omukago guno leero mu Bulange e Mmengo, Mukuumaddamula agambye nti abantu bangi balowooza nti ensonga z’amateeka z’abayivu, bokka ne balemererwa okufuna obwenkanya mu nsonga ez’enjawulo mu bitundu eby’enjawulo.

“Ssaabasajja Kabaka agoberera nnyo ensonga z’amateeka, ekitongole ekiramuzi wamu n’ensonga y’Obwenkanya, era okuva mu mukago guno tulowooza nti aba Uganda Law Society bajja kwongera okutuuka ku bantu wansi mu byalo, basobole okufuna obwenkanya.” Owek. Mayiga bw’agambye.

Ono annyonnyodde nti amateeka galina okuganyula buli muntu naddala abanaku, abaana aboobuwala, abakazi, abatamanyi kusoma na kuwandiika awamu n’abo ababeera mu byalo ewala. Ayongeddeko nti waliwo obwetaavu okulaba nti bano nabo bafuna obwenkanya .

Owek. Mayiga alabudde nti ebya Uganda okukula tebisoboka singa abantu abeetaavu tebafuna bukuumi mu mateeka. Yeeyamye okukuuma endagaano eno ku lwa Buganda era n’asuubizza okulwana okulaba ng’evaamu ebibala.

Atadde omukono ku ndagaano eno ku lwa Buganda era Ssaabawolereza w’Obwakabaka, Christopher Bwanika, agambye nti kino bakikoze okwongera okutuusa obuweereza bw’ebyamateeka ku bantu ba Kabaka wansi mu byalo naddala abo abeenyigira mu by’obusuubuzi.

Okusinziira ku Owek. Bwanika omukago guno, gwakuyamba abantu okufuna entaputa y’amateeka era nga bagoberera endagaano eno, baakufuba okukozesa enkiiko z’amasaza n’eggombolola okulaba nti aba Uganda Law Society batuuka wansi ku bantu.

Minisita agamba nti Obwakabaka bulina ekigendererwa ky’okuzzaawo ebitaawuluzi, kiyambe kukukendeeza enguzi n’okutaasa abantu ku butitimbe bw’ensimbi bwe bakozesa nga banoonya obwenkanya ky’agambye nti abamu kibalemesa okubufuna.

Ye Pulezidenti wa Uganda Law Society era nga y’atadde omukono ku ndagaano, Phiona Wall, annyonnyodde nti ebbula lya bannamateeka bamala kye kimu ku bizibu ebivuddeko bbiizineesi ezimu okugwa era wano we basinzidde okutandika okubangula abasuubuzi mu nsonga z’amateeka.

Wall asabye bannayuganda bulijjo okuteeka bannamateeka mu bbiizineesi zaabwe beewale emivuyo era kibayambe okufiirizibwa. Enteekateeka eno yakutandikira mu masaza okuli Busiro, Buddu ne Mawokota era egendereddwamu okulaba ng’omuntu asembayo wansi afuna obwenkanya.

KAMPALA BUSINESS RADIO